XXIII Seto pitsi päävä' võeti kokko (0)

Seto pits om õks ulli illos

XXIII Seto pitsi päävä’ näütsi’ jäl’, õt pitsivalmistaiji ja kaejit meil õks om. Konkursilõ „Midägi’ hindäle“ tuudi 24 täüskasunu puult tett tüüd ja 9 noorõ umma. Kokko tull 30 meistri tüü’. Töid tull Tartomaalt, Võrost, Verioralt, Põlvast, Talinast, Udmurtiast ja muidogi’ Setomaalt. Opilastöid oll Verska Gümnaasiumist, Meremäe Koolist ja Tarto Raatusõ koolist.

Hindaja’ Kangro Ulve, Kunsti Tiiu, Kala Ingrit, Kogermani Liis ja Nutovi Mirjam olli’ otsusõ tegemisõl ütel meelel ja kõik arvssi’, õt s´ool aastagal oll pall´o ilosit ja suuri töid.

Täüskasunuidõ arvõstusõh võit pääpreemia jal’ Einama Eili. Timä valmistõt ütekõrdsõst langast korrektne, höste läbi mõtõld lahendusõga’ kolmõnulgalist salli panni’ kõik tähele. Tõõnõ kotus läts Kruustigu Pillele valgõ villadsõ olasalli iist, mia oll hüä värmilahendusõga’, kõrraligu pitsi ja huvtava veereilostusõga. Kolmada kotusõ avvuhind anti Lätte Enele umaperädse põnõva seto pitsi lahendusõga’ käekoti iist. Kõik meistri’ omma’ ka’ inne konkursõl tunnustõt olnu’.

Vällä jaeti kats eripreemiat: üts nuist läts tandsurühmäle Lustiline sõbadõ kollektsiooni iist ja tõõnõ eripreemia anti Pandi Piibele unõnäopüüdjä iist. Võrost peri käsitüümeistri oll ühendänü’ idamaie ja seto kultuuri.
Nuuri edimäne kotus ilosa pitsiga’ särgi iist anti Kena Marietele. Tõõnõ ja kolmas kotus läts jagamisõlõ Auseri Krete kardina ja Tarrosõ Triinu-Liisi põllõ vaihõl.

Vällä jaeti mitmõ’ eripreemia’: Kangro Ulve eripreemia supõr tüü iist sai Einama Eili, Seto Talomuusium premeere muusiumi fondist tett pitsikoopia iist Vabarna Janet ja Seto Käsitüü Kogo eripreemia anti rahvarõivaaastal pitsiga’ põllõ ilostanu’ Tarrosõ Triinu-Liisile.

Näütüsekaejit oll s´ool kõrral kolmõ nädäli joosul peris pall´o. Hääletüskasti joudsõ 593 sedelit. Kõgõ inäp miildü rahvalõ tüü nummõr 3 ja tuu numbri all oll Kena Mariete särk. Pall´o õnnõ kõigilõ avvuhinnasaajilõ!
Pitsipäivi aigu olnu’ Suurõl Pitsipääväl opiti ja säeti seto pitsi lillipindrehe, savi sisse, söögi pääle, puidu ja tekstiili pääle. Vaest sai’ pall´o’ säält mõttit ja seto pitsi om edespidi viilgi’ inäp nätä’.
2017. a pitsipäivi teema om „Seto pitsih om õrnust ja illo“. Mi looda konkursil nätä’ asju, mia’ omma’ ilostõ piinült, õrnalt ja romantilitsõlt pitsiga’ ilostõt.

Kala Ingrit
Seto pitsipäivi kõrraldaja